بس بلاش سياسة وسباكة

السلام عليكم ورحمة الله وبركاته
الحقيقة ان ده اول لقاء لية بعالم المدونات كنت متحير ادخله بس في النهاية اقنعت نفسي اني لما هعمل مدونة هيبقي في تقدم صناعي وتجاري وطبعا عشان تعرفوا المدونة جات في برنامج الرئيس الانتخابي تحت باب مدونة لكل شاب تحت الجزء الخاص ببناء الف مصنع وتوفير مليون فرصة عمل علي العموم الكلام دة كبير عليكو وده اسمة سياسة وانا مبتكلمش في السياسة ممكن نتكلم عن فلسطين عن العراق عن الشيشان عن امريكا واللي بتعملة في اسرائيل واحنا شايفنها وساكتين حرام عليكوا دول بني ادمين ممكن نتكلم عن العيشة واللي عايشنها بس بلاش سياسة برضة ممكن نتكلم عن الاخوان المسلمين عن ا/خيرت الشاطر واللي معاه عن ا/ ايمن نور وأ/طلعت السادات لكن بلاش سياسة معلش انا بقلب المواجع بس كلة بيروح مع اول ماتش للاهلي والزمالك . تتصوروا معاية ان الريس يقول للغرب لا ده حصل النهاردة اه والله قال اية شوية ناس من بره بيقولو تبع البتاع دية بتاعة حقوق البني ادمين يعني( لما الواحد يتظلم يقفوا جنبة)المهم كانوا عايزين يحضروا محاكمة قيادات الاخوان المسلمين امام القضاء العسكري بس الريس فهم الملعوب علي طول وقال عليه الطلاق مانتوا داخلين وفعلا مخلهمش يدخلوا اصل الريس بتاعنا مفتح للحاجات دية كويس اوي اصل في ناس في البلد دية بيقولوا كفاية هو في حد بيقول للقضى كفاية مش قولتلكوا بلاش كلام في السباكة 0